Afsaana dil ka....

Log kehtein hain, nazron se bayan hoti hain dil ki baatein,
tubh badi mushkil se guzarti hain yeh din aur yeh ratein,
har pal unke khayalon mein khoye rehtein hain aise,
sapnon ki alag si duniya mein bus gayein hon jaise...

pehle toh yakeen na hota tha, mujhe in baton par,
doston se sun, hussa kartin thi mein unpar aksar,
par kuch dino se ek ajeeb sa nasha hai chaya,
mud kar jahan dekha, wahan pyaar hi pyaar paya...

socha na tha ki kabhi mera bhi aisa haal hoga,
ek ajanabi se mujhe bhi kabhi pyaar hoga,
aankhon se dil mein utarna mein bhi khub jaanti hoon,
unke dil mein bhi yehi baat hai, yeh mein maanti hoon...

par agar, sumajne mein koi bhul ho gayi ho mujse,
toh bus itni hee guzarish hai unse,
ki is dil ki baat woh bhi kabhi samaj paaye,
aur mere pass ikraar karne woh aaye...

jaanti hoon, aasaan nehin yun haal-e-dil bayaan karna,
yun khule aam mohabbat ka izhaar karna,
par darti hoon, kahin derr na ho jaye,
aur tub tuk meri doli na uth jaaye!

Bachpan...

Un dino ki baat suhani,
jubh dadi sunaye pariyon ki kahani,
hamesha kehta hai mera mann,
aa, laut aa, o mere bachpan...

choti choti baat par ladna,
kabhi rutna toh kabhi manana,
vo gudiyon ke sung adhbhuth jeevan,
aa, laut aa, o mere bachpan...

saawan kee toh baat suhani,
rim-jim barasta tha jubh pani,
vo kagaj ki kashti ke din,
aa, laut aa, o mere bachpan...

is bhaag daud se thuk gayee hoon mein,
samay roopi junjaal mein jakad gayee hoon mein,
karoongi apna subhkuch arpan,
bus aa, laut aa, o mere bachpan!

Rishtey...??!!

Pal pal mein badalte hain yahan logon ke rishte,
rote-rulate huste husatein hain yeh rishte,
jana chahti hoon mein, kahin door inse,
Par wapas aa jakadte hain yeh rishte...

Kuch kahein, jeevan banate hain yeh rishte,
hum tum se bunte hain yeh rishte,
phir bhi sochti hoon, kya mol hai inka,
aakhir kya mayene rakhte hain yeh rishte...

Maa se poocha, kya hain yeh rishte,
kyun itne zaroori hai yeh rishte,
maa ne bataya, mujhe bus itna,
bhagwan ka adhbhuth vardaan hain yeh rishte...

Kabhi ladai jaghada karatein hain yeh rishte,
toh kabhi dilon ko milaate hain yeh rishte,
sikke ki tarah, do pehlu hai inka,
kabhi 'khushi' to kabhi gum dete hain yeh rishte...

Uff, mujhe toh lage bus jun-jaal yeh rishte,
ek bhavya bhavar yeh rishte,
jinse buchna aasaan nehin itna,
isliye toh soch rahin hoon ab tak, 'kya hain yeh rishte'?!